Biblioteca Rebolo

 Rosalía sempre ten un lugar especial na nosa biblioteca, pero é importante sacala tamén do interior das tapas dos libros, por iso, o alumando de 2º da ESO escolleu e deseñou algúns dos seus poemas para mostrarllos a toda a comunidade educativa.

 Desde o noso centro, e desde a biblioteca Rebolo, sabemos que o teatro non é só un momento de desconexión e entretemento, senón que axuda a reflexionar e poñer enriba da mesa cuestións vitais e tamén nos axuda a coñecer parte do mundo que nos rodea. Por esta razón acudimos co alumnado de 4º ESO e 1º BACH a ver a proposta da compañía teatral Amorodio Teatro, A Nai . Con ela coñecemos as irmás Lola, Julia e Amparo Touza e as súas fazañas como salvadoras dunha cantidade estimada de 500 persoas durante o Holocausto, e isto serviunos para coñecermos parte da nosa historia que nos levou a reflexionarmos sobre o futuro dunha sociedade mellor a través da acción individual.

 Un ano máis, desde a biblioteca Rebolo queremos seguir colaborando cos diferentes departamentos para poñer en valor as diferentes facetas do noso alumnado. O ano pasado comezamos cun concurso de crêpes, que axudou a que o alumando coñecese parte da cultura culinaria francesa, ampliase o vocabulario e demostrase a todo o centro que tamén sabe cociñar. Este ano seguimos coa iniciativa, pero ampliando a proposta con pancakes. Para isto contamos coa colaboración das profesoras de francés e inglés que impulsaron esta actividade entre o seu alumando de 2º ESO. Aquí vos deixamos unha mostra da difícil tarefa que tivo o noso xurado, e da que deron boa conta logo os alumnos e alumnas que se achegaron no recreo á biblioteca!

 Este ano o Día das Letras Galegas está dedicado ás cantareiras e á poesía oral popular, e aínda que centra a súa homenaxe nas Pandeireteiras de Mens, sabemos que é un campo moito máis amplo. En Carballo temos unha boa mostra disto, por iso o concello decidiu realizar unha proposta de actividade de recollida de cánteghas  para logo pasar a un arquivo municipal.  O noso centro quixo formar parte desta iniciativa e tivemos connosco a dúas persoas coñecedoras do tema que nos viñeron informar sobre a actividade: Hadrián García e Ramón Varela. Despois desta información sobre que é unha cántegha  e a mostra dalgunhas das cantereiras do noso concello, deixámoslle a proposta ao noso alumando, actividade que realizaron voluntariamente e da que puidemos recoller máis de 10 mostras máis que serán engadidas a este arquivo municipal. https://www.facebook.com/reel/962223996001520

No mes de novembro o alumnado de 2º ESO puido converterse por unhas horas en regueifeiro. Josinho da Teixeira e Lupe Blanco foron os encargados e mostrarlle ao noso alumnado o divertido que pode chegar a ser a construción dunha copla desde a improvisación e cuns mínimos coñecementos.  https://youtu.be/vFL5CSdSQjA Estes obradoiros, organizados desde o equipo de Dinamizaición da Lingua e a Biblioteca Rebolo tiveron a colaboración do Servizo de Normalización Lingüística do Concello de Carballo e forman parte do Proxecto Enreguéifate   https://enregueifate.gal/oproxecto/  co que se procura impulsar a improvisación oral en verso e contribuír a través dela á promoción da lingua galega.

 Desde o noso centro intentamos manter as portas abertas da nosa biblioteca o máximo de tempo posible, e queremos que o noso alumando a desfrute, a poña en valor, a coñeza... Por iso, e centrándonos no alumando de 1º ESO que son os novos integrantes, coa colaboración das e dos titores destes grupos, o noso alumnado fixo unha visita á biblioteca en hora de titoría e alí informámolos dun concurso que queremos facer para que busquen información e exploren o noso catálago. Propuxémoslle que elaboraran unha portada do seu libro favorito ou aquel que queren recomendar.  Os e as máis creativas incluso fixeron unha reinterpretación de contos clásicos mesturados, que xa quedaron como parte dos fondos e exposición permanente da biblioteca. Aquí vos deixamos os traballos finais! E aquí as portadas e historas máis creativas e orixinais que gañaron os premios:

 O  alumnado de 2º ESO e 3ºESO asistiu no Pazo da Cultura de Carballo á representación da obra de teatro “Apaga o Candil” a cargo da compañía Contraproducións e da mán da dirección de Cándido Pazó. Nesta representación que forma parte do 33 Festival Internacional Outono de Teatro (@fiotcarballo), recordaron teatralmente a figura de Carlos O Xetal, folclorista, contador de historias e humorista galego de gran popularidade nos anos 60 e morto nos 90. Diversión, emoción e reflexión nun espectáculo que reivindica a riqueza da tradición oral e a memoria rural como unha das bases da identidade cultural.

Desde a biblioteca Rebolo e desde o noso centro seguimos apostando polo teatro nas diferentes facetas. Neste caso, un grupo de alumnos da ESO participou, coordinados pola profesora que coordina o EDLG e forma parte do equipo de biblioteca, na 23º edición do concurso escolar de Teatro Lido "Xosé Manuel Eirís" cunha adaptación da obra de Manuel Núñez Singala, O achado do castro .  Na ligazón  https://youtu.be/1fga4UOfP8Q?si=WG34rFzySs7Kz4pf  podedes ver o vídeo da súa participación.  Podedes ver todos os vídeos participantes na súa canle de YouTube:  XXIII Concurso Escolar de Teatro Lido 'Xosé Manuel Eirís' 2024:  https://www.youtube.com/playlist?list=PLXWhCf_vEVNZB7cSMlTSy_Tgu9qeN0cKL O noso alumnado non gañou o premio, pero recibiu uns diplomas e uns agasallos pola súa participación.

 Desde o EDLG e coa colaboracion da biblioteca Rebolo e do Departamento de Artes Plásticas, por sexto ano convocamos o Concurso de postais de Nadal. O obxectivo é que o alumando mostre as súas habilidades artísticas. 

 O ano pasado tivemos a sorte de contar con varios alumnos e alumnas que colleron as rendas da Biblioteca Rebolo e, despois dunha formación inicial, puideron participar e axudar nas diferentes tarefas que se levan a cabo desde este espazo.  Hoxe é o día no que lles entregamos os diplomas e lles agradecemos a súa colaboración. As portas desta biblioteca sempre estarán abertas para vós! Aquí vos deixamos algunhas imaxes da entrega de diplomas por parte do novo alumnado axudante.